Ulahon Ma Haluaonmi

Turpuk:  2 Musa  7: 14-25 (Ep. Job 38: 25-33)

I.                   PATUJOLO

Ndang adong na marhagogoon mangambati sangkap ni Debata laho paluahon bangsoNa. Disangkapi laho paruarhon Israel sian tangan ni Firaun asa gabe bangso na marsomba/ beribadah nasida. Nangpe naung tardok na gogo Firaun di tingkina, alai tung so tuk do i mangambati sangkap ni Debata laho paluahon bangsoNa. Ndang marnangon huaso ni Firaun mangambati sangkap ni Debata.

Ditonahon Debata do tu si Musa laho patupahon tanda sian Debata. Di turpuktaon aek gabe mudar. Dalan ni Debata do i papatarhon paboa Ibana do Jahowa na sun marhagogoon. Jala na marsangkap ma ibana paluahon bangsoNa sian tangan ni Firaun na menindas, manggosagosa  dohot marlomolomo tu nasida. Tapaihutihut ma di bagasan turpuk jamitantaon, songon dia do Debata paluahon bangsoNa i.  

II.                HATORANGAN – PANGABAHAN

1. Debata martontang dohot  Firaun paluahon bangsoNa

Disangkapi Debata  naeng mamboan haruar bangso Israel sian parhatobanan Misir. Ndada holan mamboan boti sintuhu ni ulaon ni Debata tu nasida, alai na umbagas sian i dope, di ayat 16 didok; “Loas bangsongKu laho, asa disomba Ahu di halongonan”. Na marlapatan do i memerdekahon Israel sian parhatobanon. Merdeka/bebas ndada na marlapatan gabe bebas tanpa kendali mangulahon manang aha, manang gabe nasida tuan di nasida, alai kemerdekaan di pengabdian tu Debata. Ojahan, unok dohot tujuan ni kemerdekaan ni bangso i, ima; pelayanan atau pengabdian, atau ibadat kepada Tuhan. Di keadaan na merdeka i, Israel gabe naposo/ hamba ni Debata (3 Musa 25:42, 55).

Bangso Israel nampuna ni Debata na sah, alai na pinarlomolohon ni Firaun; di gosagosa jala diparhatoban. Paluahon bangso i sian si Firaun na marlapatan do i mengembalikan keadaan hukum yang telah diinjakinjak Firaun sekian lama.

Martongtang (berkonfrontasi) Debata dohot Firaun laho patulushon sangkapNa paluahon Israel. Di partongtangan i dipatuduhon Firaun do tangkang ni rohana. Di bukku 2 Musaon dihatindangkon 20 hali pandohan martangkang ni roha si Firaun. Dipatupa Debata uhum (tulah), aek gabe mudar laho patandahon  “hagogoon ni Jahowa” na mangido tu Firaun asa paloashon Israel haruar sian gomgomanna.

  Sada na torang tabereng di partongtangan i; na parjolo, huaso ni Debata maralohon huaso na adong di portibion. Di ujungna gabe sada credo/ pengakuan do i di Israel paboa marhite tangan na gogo Israel dipalua sian parhatobanan Misir. Napaduahon, Debata sipangantoi di kemerdekaan ni bangsoNa sian tangan ni na manggosagosa hak dohot kebebasanna.

Angka dongan na pinarhamaol ni Debata, martontang do Debata maralohon dosa dohot hamatean di bagasan Jesus Kristus laho memerdekahon manang paluahon hita sian i. Di pihak ni Debata do hamonangan di partongtangan i. Asa angka na porsea tu Jesus Kristus nungnga be merdeka manang malua sian huasona. Sibasabasa do i di hita sian Debata. Sipahusorhusoronta di ngolunta songon dia do hita mengisi kemerdekaan manang haluaon i. Sada na pasti kebebasan na berkepatuhan do anggo kebebasanta di bagasan Jesus Kristus. Di hadirion na bebas berkepatuhan i, sada kesempatan do i di hita laho pahembangkon lomo ni roha ni Debata.

Tarajumi do torop sian tonga ni hita naung taruli hamonangan i, gagal mamangke tingki na ni dalananna. Lapatanna, ndang di isi haluaon naung jinalona di bagasan Jesus Kristus dohot angka ulaon na sarrombang tu si. Torop marlembalemba hita angka Kristen. Lemba  mamelehon ngolu dohot tingki tu Debata. Marhite jamitaon, disosoi do hita, songon Israel na pinaruarna asa marsomba/ beribadah do nasida tu Debata. Portibion ingkon rajumanta do songon panggung/ inganan beribadah di hita. Asa di angka profesinta, baik guru, sittua, pandita, partigatiga, kontraktor  dohot angka profesi na asing sada lapangan do i di hita, ima lapangan beribadah.

Na mangihut muse, dijou do hita asa hobas hita paluahon angka dongan na tertindas manang na targosagosa. Tertindas manang hona gosagosa alani ketidak adilan dohot kesewenangwenangan ni pihak tertentu.

2. Debata papatarhon huasoNa marhite “aek gabe mudar”

Dipatupa Debata do tanda, ima aek gabe mudar. Dibalik ni tanda i, Debata do na mangula. Aek ima sada haporluan na primer di jolma na mangolu. Holan 7 borngin do masa songon i dibahen Debata nungnga humasusa nasida mangalului aek si inumon ni halak Misir. Autsura pintor montok aek di portibion marudut ma tu tanda-tanda kematian. Ai nang di dagingtaonpe adong do aek. Dipangke Debata do sada sian kebutuhan na primer ni jolma laho patandahon paboa Ibana do Jahowa. Dihirim roha ni Debata do tanda i manogunogu roha ni Firaun asa manada Debata dohot hagogoon ni huasoNa. Alai tongtong do ibana martangkang ni roha ala boi dipatupa angka parsibalikmata sisongon i. Songon i do na masa, lam tu tangkangna do jolma na so mananda manang na manoishon angka tanda na pinatupa ni Debata.  

Sasintongna, dalan ni Debata do angka tanda i laho manogihon tu panandaon na tangkas di huaso dohot hagogoonNa. Di balik ni tanda aek gabe mudar, ima Debata na mangula. Lapatanna, tanda i, ima na boi binereng ni si malolong, alai anggo hagogoon ni Debata na mangula di balik ni i, di bagasan roha na ma i pahusorhusorhusoron. Si Firaun, nungnga martangkang ni roha ibana. Ndang dapot be roha dohot ateate na pahsorhusorhon, ise do na mangula di balik ni tanda i.

Dalam rangka patulushon haluaon ni Debata do tu Israel dipatupa Ibana tanda i marhite si Musa dohot Aron. Lapatanna, ojahan ni tanda i, ima sangkap haluaon/ kemerdkaan ni Israel. Asa ndang boi tarsirang hita, tanda aek gabe mudar sian sangkap haluaon na naeng sipatuluson ni Debata.

Angka dongan na pinarhamaol ni Debata. Molo tu hita angka na porsea di bagasan Jesus Kristus, ndada marhite tanda be Debata papatarhon huaso dohot hagogoonNa laho patupahon haluaon/ kemerdekaan tu hita. Nungnga langsung Debata sandiri ro manopot hita di bagasan Jesus Kristus. Hagogoon ni huasoNa patar si tutu di hita di na hehe Jesus Kristus sian na mate. On do na hinatindangkon ni angka apostel tu hita. Dalam rangka haluaonta manang kemerdekaanta do sian huaso ni dosa dohot hamatean dipahehe Debata Jesus sian na mate marhite hagogoonNa.

Nungga bebas/ merdeka  hita sian huaso ni dosa dohot hamatean i. Nungnga be marngolu na imbaru hita ala ni hagogoon ni Debata naung patar na paheheon Jesus sian na mate  i. Alani i, marparange ma hita di haimbaruon i. Imabru di pola pikir, imbaru di pangkataion, imbaru di cara panangkasion tu angka na masa. Di saluhut hadirionta ma tahe ingkon imbaru.

Tarboanboan do hita di partingkianta saonari mulak mamarangehon ngolu na robi, di pangalaho nang di pangkataion. Di maol ni keadaan na ta adopi laho mampartahanton ngolu; “orang yang tidak mengikuti arus, tidak akan kedapatan kebagian”, “orang yang tidak ikut berlaku curang, tidak akan kedapatan bagian”. On do tantangan di hita di partingkianta saonari. Masa ma keserakahan, haormuson, penipuan, masipaotootoan di bagasan dame. Ujungna, gabe mulak ma muse hita mamparangehon ngolu na robi i.       

Kemerdekaan/ kebebasan naung dibasabasahon Debata tu hita di bagasan Jesus naung mulak mangolu i, ima kebebasan na ingkon berkepatuhan, kebebabasan na patuh, taat tu Debata. Antong ta operasihon ma ngolu na marhaimbaruon i. Marparange ma hita di hamimbaruon i. 

III.             PANIMPULI

Ia mangolu pe hita nuaeng mangolu di Tuhan i do. Ia mate pe hita mate di Tuhan i do. Antong mangolu manang mate pe hita tongtong do di Tuhan i. Ai nungnga dimerdekahon/ dipalua hita marhite tanganNa na marhagogoon i sian huaso ni dosa dohot hamatean. Antong binsan sadihari dope, ta ulahon ma haluaonta i. Diboto Debata do tuk ni gogonta mangulahon haluaonta i, ido umbahen didok; “Ai idama sai na dongananKu do hamu rasira sa ajal ni hasianganon”. Amen